នាយកដ្ឋានបច្ចេកវិទ្យាព័ត៌មាន

ក្រសួងសេដ្ឋកិច្ចនិងហិរញ្ញវត្ថុប្រកាសដាក់ដំណើរការជាផ្លូវការ ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់កាលទី ២

ថ្ងៃទី១ ខែកញ្ញា, ២០២១ | Touch Sangrotha

នៅព្រឹកថ្ងៃទី១ ខែកញ្ញា ឆ្នាំ២០២១ ក្រសួងសេដ្ឋកិច្ចនិងហិរញ្ញវត្ថុ បានប្រកាសពិធីដាក់ដំណើរការជាផ្លូវការ ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដំណាក់កាលទី ២ ក្រោមអធិបតីភាពដ៏ខ្ពង់ខ្ពស់របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ ដោយមានការចូលរួមពីក្រសួង-ស្ថាប័នដែលបានចូលរួមការងារចុះបញ្ជីអាជីវកម្មថ្នាលបច្ចេកវិទ្យាព័ត៌មានដំណាក់កាលទី ១ និង ដំណាក់កាលទី ២, តំណាងសមាគម, អង្គការសង្គមស៊ីវិល, ដៃគូអភិវឌ្ឍន៍, ស្ថានទូត និងគ្រឹះស្ថានសិក្សា ។

ប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន គឺជាការកែទម្រង់មុតស្រួចជាកញ្ចប់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញ ក្នុងវេទការាជរដ្ឋាភិបាល-ផ្នែកឯកជន លើកទី១៨ កាលពីថ្ងៃទី២៩ ខែមីនា ឆ្នាំ២០១៩ កន្លងទៅ ។ ក្នុងដំណាក់កាលទី ១ ប្រព័ន្ធបានគ្របដណ្តប់លើការចុះបញ្ជីពាណិជ្ជកម្មរបស់ ក្រសួងពាណិជ្ជកម្ម, ការចុះបញ្ជីពន្ធដាររបស់ អគ្គនាយកដ្ឋានពន្ធដារ និងការផ្តល់សេចក្តីប្រកាសជូនដំណឹងបើកសហគ្រាសរបស់ ក្រសួងការងារនិងបណ្តុះបណ្តាលវិជ្ជាជីវៈ និងបានដាក់ឱ្យដំណើរការជាផ្លូវការនាថ្ងៃទី១៥ ខែមិថុនា ឆ្នាំ២០២០ ។ ដោយឡែក ក្នុងដំណាក់កាលទី២ នេះ ប្រព័ន្ធចុះបញ្ជីអាជីវកម្មពង្រីកវិសាលភាពដល់ការស្នើសុំអាជ្ញាបណ្ណ ឬលិខិតអនុញ្ញាតផ្សេងៗតាមអនឡាញ ទៅតាមសកម្មភាពអាជីវកម្ម ពីក្រសួង-ស្ថាប័នជំនាញដែលមានតួនាទីត្រួតពិនិត្យផ្នែកបច្ចេកទេសតាមវិស័យ ។ ក្នុងនោះ ក្រសួង-ស្ថាប័នចំនួន ៤ បានចូលរួមក្នុងដំណាក់កាលទី ២ នេះ រួមមាន៖ ១-ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ២-ក្រសួងទេសចរណ៍, ៣-ក្រសួងប្រៃសណីយ៍ និងទូរគមនាគមន៍ និង ៤- និយ័តករអាជីវកម្មអចលនវត្ថុ និងបញ្ចាំ នៃ អាជ្ញាធរសេវាហិរញ្ញវត្ថុមិនមែនធនាគារ ៕

ព័ត៌មាន

ព័ត៌មានពាក់ព័ន្ធ

កម្មវិធីបញ្ជ្រាបការយល់ដឹងអំពី “ហានិភ័យ និងសុវត្ថិភាពនៃការប្រើប្រាស់បច្ចេកវិទ្យាព័ត៌មាន និងឌីជីថល”

សេចក្ដីជូនដំណឹងស្ដីពីការជ្រើសរើសបុគ្គលិកជាប់កិច្ចសន្យា ១ រូប ផ្នែកគ្រប់គ្រងប្រព័ន្ធកម្មវិធីមេ

សេចក្ដីជូនដំណឹងស្ដីពីការជ្រើសរើសបុគ្គលិកជាប់កិច្ចសន្យា ១ រូប ផ្នែកគ្រប់គ្រងប្រព័ន្ធកម្មវិធីមេ